اهوجس بصوت عالي

قبل أسبوع تقريباً كنت اسولف مع عمتي عن وظائف الديوان الخدمة المدنية هالوظائف الا اغلب

بنات المملكة الا متخرجات من الجامعة ولا الكلية قدموا فيها وبالأخير يا عمري عليهم

كم بنت بس اللي يقبلونهم والله يعلم وين يعينونهم وعاد مايحتاج الله يعز الحكومة

الطررق ميسرة ومسهله و ما يمر كم شهر إلا  وأشوف موقع جريدة الرياض

مسوين ملف الثاني للحوادث المعلمات

المهم قلت لها لو تخرجت من الجامعة وما كملت دراستي الماستر و ما سمحوا لنا بعد نشتغل بالقضاء

ما راح أفكر مجرد تفكير إني أقدم أوراقي للهم أصلن راح علق شهادتي فوق سريري بالغرفتي.

وشوف لي وظيفة أنا والواسطة لا تتعلق بالشهادة عمتي بردها لي أكتفت بكلمتين

 أهم شي انك متعلمة ولازم يكون عندك شهادة إحنا يكون عندنا الشهادة أهم من الوظيفة

بعكس رجال إلا وظيفتهم أهم من شهادتهم

بالبداية ما اقتنعت قعت اهوجس مع بنات أفكاري بكلامها وخاصة معروف

ان عمتي مخها مادي وتجاري لو توقفت عن أكمال دراستي بالجامعة ويكفي العلم

اللي تعلمته من الجامعة خاصة (لو نجحت بالمواد هالترم) راح تكون سنة

مشروع التخرج مدام إني ما عندي نية اعمل بشهادتي والتحق للعمل بمكان ما

بس بعد عمر طويل يمكن انشغل بحياتي الخاصة و أتوقف عن العمل وقتها ما يكون عندي شهادة

تثبت ذلك بالنسبة لي اقتنعت ان شهاداتي أهم من عملي اللي بشتغله

بالنسبة للرجل بعد عمر طويل لو فكرت بزواج و ش يهمني أكثر من بعد دينه و أخلاقه واصله

شهادته ولاوظيفته مثلاُ لو تقدم لي شخصين والكل يمدحون دينهم وأخلاقهم وكلهم بالثلاثينات

الأول شهادته جامعية معلم وراتبه 5000 والثاني عسكري رتبته الرقيب ولا مقدم

المهم شهادته الثانوية بس راتبه 7000 و ش يهمني أنا أكثر ان اقبل بالرجل

 شهادته عاليه ولا وظيفته حلوه

بالبداية قلت لا لا أكيد ابوافق ع الجامعي وخاصة لو كان معه الماستر والدكتوراه لأنه عقله

أكيد متفتح وإنسان متعلم ويكفي بعد عمر طويل أقول لعيالي اتعلموا شوفوا أنا وأبوكم جامعيين

والأهم ان شهادتي مو أقل من شهادته ويكفي لما احكي له عن معناتي بالجامعة يكون فاهم

 وش أقول له بس لما سمعت صوت ابوي بالصالة وهو يوصي خواتي قبل ما يسافر ع دراستهم

 قلت لا لا عادي أوافق ع رقيب ليش لا

لما أفكر بحاله ان ابوي اكتفى بالشهادة الابتدائية وما كمل دراسته(والله وكلي فخر فيه) واشتغل

وعمل وقدر ان يوفر له عمل يكفيه وتزوج أمي وهي شهادتها جامعية وقدر ان يربى أبناءه

ع دين وخلق وتعلموا والأهم إني لم اشعر يوم انه شخص مو متعلم وشهادته تعليمية أقل من إخوانه

وأبناء عمه أقول ان عمل الرجل أهم من شهادة وأقتنع بهالكلام أكثر لما اجلس معه وبرفقتنا أشخاص

ارتبط اسمهم بحرف د والله و الله أشوف ابوي متفتح ببعض المواضيع أكثر منهم

لدي قناعة بان طبيعة التي خلقنا فيها والأشخاص الموجدين حولينا هي سبب بتأثر بتفكيرنا وشخصيتنا

وتطورها ربما التعليم له أثر بشخصيتنا لكن طبيعة حياتنا أكثر..ربما أكون مخطئه بذلك لكن

هالقناعة بداخلي استمدتها من والدي..

فكرت شوي بعد عمر طويل بعيالي ولاحظت ان طوال حياتي وخاصة بالجامعة قد سئلت

من قبل البنات الملاقيف ليان أبوك وش يشتغل..لكن لم يمر علي يوم بحياتي سؤال ليان

أبوك وش شهادته…؟؟(وترى هالسؤال ما أحبه احس عيب ان وحده تسأل أبوك ولا رجالك

وش يشتغل )حتى بحياتنا لما يتحدث شخص إمامك عن شخص ما نسأله أولاً عن عمله

فلان وش وظيفته…؟؟

شهادة ابوي الابتدائية ما أثرت فيني بتعامله معي وأنا أشوفه ناجح بعمله ولله الحمد

فعيالي ما راح يتأثرون لو أبوهم كان تعليمه اقل مني و لا حتى معه الثانوية

حتى بحياتنا في أشخاص نسمع عنهم التعليم ما أفادهم إلا بشهادة الورقة اللي معهم.

لا تطور تفكيرهم ولا حتى أخلاقهم..تشهد بذلك..ونجد أشخاص ما معهم إلا شهادة الابتدائي

لكن تفكيرهم وتعاملهم وأخلاقهم أكبر من هالشهادة وشخصياً والدي أكبر مثال على ذلك…

قبل ما اكتب هالكلام تحدثت مع البنات بالمسن و كل وحدة أبدعت برأيها الفلسفي (مستحيل

اخذ واحد شهادته الثانوية أقل مني حتى لو راتبه مغري أكيد تفكيره غير عن الجامعي)

قلت للهم لا تقسون وترفضين شخص عشان شهادته..ولا شهادتك أكبر من شهادته

دينه وأخلاقه واصله و عمله سواء كان بالقطاع العسكري ولا بالشركات..ناسبتك

اسألوا عن طبيعة اللي خلق فيها والأشخاص اللي حوله ترى شهادته مو أهم من عمله

والأهم بعدين عقليته يانوف:)